Гал зогсоох гэрээнд гарын үсэг зураад дөнгөж 24 цаг ч болоогүй байхад Израйл болон Хезболла бүлэглэлүүд гэрээгээ мартсан бололтой, бие биеэ бөмбөгдсөөр л байна. Израйлийн агаарын цохилтын улмаас Өмнөд Ливанд наад зах нь 20 хүн амиа алджээ. Орон нутгийнхны хэлж буйгаар Набатиех дүүрэгт 16, хөрш Саидад 7 хүн амь үрэгдэж, олон хүн шархадсан байна. Харамсалтай нь, Барич хотод нэгэн гэр бүлийн дөрвөн хүн (аав, ээж, хоёр хүүхэд) амиа алдсан гэх гунигт мэдээ ч байна.

Израйлийн арми харин өөрсдийгөө өмөөрч "Хезболла түрүүлээд бидэн рүү 50 гаруй пуужин харвасан шүү дээ. Тиймээс бид хариугаа авч тэдний хэдэн арван байгууламжийг устгалаа" хэмээн мэдэгджээ. Энэ үеэр Израйлийн нэг цэрэг мөн амь үрэгдсэн байна.

АНУ-ын "толгойны өвчин" Вашингтон энэ байдалд нэлээд бухимдуу байгаа бөгөөд Израйлийн үйлдэл Ирантай хийх гэж буй том энхийн гэрээг нь баллачих вий гэдгээс болгоомжилсон байдалтай суух аж. Тиймдээ ч АНУ-ын тусгай элч Стив Виткофф байдлыг намжаах найдлага тээсээр Швейцарыг зорьжээ.

Хезболлагийн хувьд "Израйл л гэрээгээ зөрчөөд байна. Бид газар нутаг, тусгаар тогтнолоо хамгаалах бүрэн эрхтэй" гэж мэдэгдэн, пуужингаа зогсоох бодолгүй байгаагаа илэрхийлэв. Ер нь энэ хоёрын хувьд "Гал зогсоох" гэдэг нь маргааш нь бие бие рүүгээ дахин галлах "завсарлага" төдий зүйл болоод уджээ.

Дөжирсөн үхэл ба Трампын магтаал Хамгийн их хохирч буй нь мэдээж Ливаны ард түмэн. Эмнэлгүүд ачааллаа дийлэхээ больж, Улаан загалмайн аврагчид хүртэл цогцос зөөхөөс өөр ажилгүй болтлоо туйлдаж байна. 30 гаруй жил аврагч хийсэн Али гэх эр "Бид бүр үхэлд дасчихаж дээ. Одоо бидний хувьд хүний амь зүгээр л нэг тоо болж хувирсан" хэмээн гашуун үнэнийг өгүүлжээ.

Хамгийн сонирхолтой нь, Цагаан ордон Израйлийг "энхийн гэрээг нураах нь" хэмээн шүүмжилж байх зуур, Ерөнхийлөгч Доналд Трамп шинэхэн "Air Force One" онгоцоо танилцуулах үеэрээ Израйлийн Ерөнхий сайд Нетаньяхуг "жинхэнэ дайчин" хэмээн магтаад амжжээ. Одоогоор Израйл Ливаны газар нутгийн 5 хувийг эзлэн түрэмгийлж, сая орчим хүн орон гэрээсээ дүрвээд байна.