Ираны дайнтай холбоотойгоор дотоодын нөөцөө "харамлан" хамгаалж, экспортоо хатуу боомилсон ч Хятад улс тавдугаар сард шатахууны цоргоо бага зэрэг нээж, Зүүн Өмнөд болон Өмнөд Азийн орнууд руу бензин, дизель, онгоцны түлшнийхээ урсгалыг дөрөвдүгээр сарынхаас нэмэгдүүлсэн байна. Гэхдээ хэт их баярлах болоогүй ээ, өнгөрсөн оны мөн үетэй харьцуулахад энэ нь хамаагүй чамлалттай тоо юм шүү.
Гаалийн мэдээллээс харвал, Хонгконг болон Макаогаас бусад бүс рүү хийсэн цэвэршүүлсэн газрын тосны бүтээгдэхүүний экспорт дөрөвдүгээр сараас 40%-иар өссөн ч, өнгөрсөн жилийнхээсээ 69%-иар буурсан үзүүлэлттэй байна. (Мэдээж олон улсын хөлөг онгоц, нисэх онгоц цэнэглэх болон "дүү нар" болох Хонгконг, Макао руу гаргах экспорт энэ хатуу хязгаарлалтад орохгүй бөгөөд хэвийн үргэлжилж байгаа гэнэ).
Бензиний хувьд Хятадаас гарах нь бараг л "ховор амьтан" болж, дөрөвдүгээр сард сүүлийн 10 жилийн хамгийн доод цэгтээ буюу 23,400 гаруйхан тонн хүртэл шалдаа бууж байсан бол, тавдугаар сард арай гэж 32,838 тонн болж өсжээ. Хонгконг, Макаог эс тооцвол Мьянмар л цор ганц азтайгаар 8,405 тонн бензин салгаж дөнгөсөн байна.
Харин дизелийн экспорт (биодизелийг оруулаад) өмнөх сараас 53%-иар цойлжээ. Хонгконг, Макаог хасаад тооцвол дизелийн экспорт хоёр дахин нэмэгдэж 216,196 тоннд хүрсний дотор Бангладеш 62,772 тонн, Шри Ланка 28,700 тонныг авчээ. Зүүн Өмнөд Азийн Мьянмар, Камбож, Лаос, Тайланд зэрэг орнууд нийлээд 77,079 тонныг хувааж хүртсэн байна. Азийн бус ганц импортлогч нь Австрали байсан бөгөөд 20,255 тонн дизель "зулгуйджээ".
Хамгийн сонирхолтой нь хуучин хоолны шарсан тосоор голдуу хийдэг биодизелийн экспорт өмнөх сараас 11.5%-иар өсөж, 43,636 тоннд хүрснээр Нидерланд, Бельги зэрэг орнууд гол худалдан авагч нь болжээ.
Онгоцны түлшний тухайд (Хонгконг, Макаог эс тооцвол) өнгөрсөн жилийнхээс 61%-иар навс унасан ч, дөрөвдүгээр сараасаа бол 20%-иар өндийж чаджээ. Вьетнам хамгийн том зүсмийг нь буюу 97,900 гаруй тонныг авсан бол, Австраличууд тавдугаар сард ширээний ард сууж хэлэлцээр хийснийхээ хүчинд тохиролцсон хэмжээгээ буюу 79,000 тонныг хүлээж авсан байна.
